„Ég er gríðarlega ánægð og líður mjög vel. Þetta sýnir að það er allt hægt og við getum gert stóra hluti þó að við séum frá litlu landi.“
Þetta segir Hrafnhildur Lúthersdóttir í Morgunblaðinu í dag, en í gær synti hún fyrst íslenskra kvenna til úrslita á heimsmeistaramóti í 50 metra laug, í Kazan í Rússlandi.
Hrafnhildur endaði í sjötta sæti, sem var langt fyrir ofan væntingar hennar fyrir mótið. Hún viðurkenndi í samtali við íþróttablað Morgunblaðsins, að stressið hefði heldur betur sagt til sín fyrir úrslitasundið.