Þriggja vikna sannkallaðri ævintýraför Íslendinga á Evrópumóti karla í knattspyrnu lauk ekki á þann veg sem þjóðin vonaði. En þrátt fyrir tap í síðasta leik í gærkvöldi gegn gestgjöfunum, Frökkum, sem gætu hæglega sigrað á mótinu, ganga Íslendingar stoltir frá borði.

Það var áberandi, hvar sem komið var í Frakklandi, til Parísar, Nice, Marseille, Saint-Étienne eða smábæjarins Annecy í Alpafjöllunum, þar sem landsliðið hafði bækistöðvar meðan það var á EM, hve fólk hreifst af landsliði Íslendinga og stuðningsmönnunum. Mörgum þótti með hreinum ólíkindum hvað þessi fámenna þjóð úr norðri hafði afrekað. Og ekki má gleyma því að í þessari fyrstu úrslitakeppni Evrópumóts sem karlalandsliðið tekur þátt í tapaði það aðeins þessum eina leik, gerði tvö jafntefli og sigraði í tveimur leikjum; sló meðal annars England út í 16 liða úrslitum með 2:1 sigri. Það hefði einhvern tíma þótt saga til næsta bæjar!

Það var ógleymanlegt að vera á Stade de France í gærkvöldi. Hátt í klukkustund eftir að flautað var til leiksloka, þegar allir frönsku stuðningsmennirnir voru löngu farnir sungu þeir íslensku enn hástöfum og hylltu sína menn sem komu að áhorfendapöllunum til að þakka fyrir sig. Rigningin skipti engu máli!

Öll ævintýri taka enda og þessu í Frakklandi er lokið. En góð innistæða er fyrir því að hlakka til næstu ára. Takk, strákar!

Tengdar fréttir

EM 2016 í fótbolta

Danir slógu Evrópumeistarana úr leik

• Landsliðið tilnefnt til verðlauna – almenningur kýs
• Enska liðið mætti með smá hroka
• Þakklát fyrir boðið til Íslands
• Notkun gagnamagns jókst um 600%

» Fleiri tengdar fréttir

• 1 blogg um fréttina

Bloggað um fréttina

• Ómar Gíslason: TAKK FYRIR MIG LANDSLIÐ