B-riðill 2. deildar heimsmeistaramóts íshokkís kvenna sem halda átti í Reykjavík dagana 27. febrúar til 5. mars verður haldið á Akureyri í staðinn. Þetta kemur fram á vefsíðu íshokkísambandsins í dag.
Þann 8. september ákvað haustþing alþjóða ísknattleikssambandsins að halda mótið hér á landi, í Reykjavík nánar tiltekið, en nú hefur verið breytt um staðsetningu og mótið fært til Akureyrar. Norðanmenn fagna þessari ákvörðun en Skautafélag Akureyrar verður einmitt 80 ára í janúar og því má segja að afmælinu verði fagnað með því að hýsa HM norðan heiða.
Þær þjóðir sem munu senda lið sitt til Íslands eru Tyrkland, Nýja-Sjáland, Rúmenía, Spánn og Mexíkó. Síðasta heimsmeistaramót í 2. deild B var haldið á Spáni í fyrra, þar sem Ísland endaði í þriðja sæti. Þá vann Ísland Mexíkó í vítakeppni og Ástralíu af öryggi, en tapaði fyrir Slóveníu, Spáni í vítakeppni og Belgíu í framlengingu.
Jussi Sipponen er landsliðsþjálfari kvenna í íshokkíi.