Tékkneska tennisstjarnan Petra Kvitová er farin að geta beitt vinstri hendinni á ný eftir að hafa orðið fyrir hnífaárás á heimili sínu í bænum Prostejov í austurhluta Tékklands í desember.
Frétt mbl.is: Ég er heppin að vera á lífi
Kvitová kvaðst heppin að vera enn á lífi eftir að maður komst inn á heimili hennar í Prostejov, í tilraun til ráns að því er talið er. Hann flúði af vettvangi eftir átökin. Hún þurfti að gangast undir aðgerð og læknar ráðlögðu henni að hvíla í hálft ár, en ekki er hægt að negla niður dagsetningu á endurkomu hennar þótt batinn gangi vel.
Petra Kvitová hefur náð langt á stórmótum undanfarin ár en auk þess að vinna Wimbledon bæði 2011 og 2014 fékk hún bronsverðlaun í einliðaleik á Ólympíuleikunum í Ríó í sumar og hefur komist í undanúrslit í bæði Opna franska og Opna ástralska mótinu.