Ítalski hjólreiðamaðurinn Michele Scarponi lést eftir árekstur við sendiferðabíl þegar hann var á hjólreiðaæfingu. Scarponi var 37 ára gamall margverðlaunaður hjólreiðakappi og hafði meðal annars unnið Giro d'Italia-mótið árið 2011.
Slysið átti sér stað nálægt heimili hans á Ítalíu á gatnamótum. Hann lætur eftir sig eiginkonu og tvö börn.
Nýverið vann hann mótið Tour of the Alps. Þetta var fyrsti sigur hans í fjögur ár. Hann var að æfa sig fyrir næsta Giro d'Italia-mót sem hefst 5. maí.