Björk Óðinsdóttir hafnaði í 7. sæti af 12 keppendum í B-grúppu í -63 kg flokki kvenna á heimsmeistaramótinu í ólympískum lyftingum sem fram fer í Kaliforníu í Bandaríkjunum.
Björk setti Íslandsmet í snörun þegar hún snaraði 85 kg í annarri tilraun og tvíbætti síðan metið í jafnhendingu þegar hún lyfti 106 kg í fyrstu tilraun og 109 kg í annarri, Björk reyndi síðan við 112 kg í þriðju tilraun og sat undir þeirri þyngd en það hefði verið þyngsta jafnhending íslenskrar konu frá upphafi.
Árangurinn 194 kg er nýtt íslandsmet í samanlögðu en Þuríður lyfti sömu þyngd í gær í -58 kg flokki. Björk var með slakasta árangurinn skráðan inn í mótið í -63 kg flokki kvenna og því er þetta frábær árangur.
Hin finnska Saara Leskinen átti einnig gott mót og fór með 5/6 lyftum í gegn en lyfti einu kílói minna en Björk, sænski ólympíufarinn Angelica Roos féll úr keppni í snörun þegar hún náði ekki að lyfta opnunarþyngdinni sinni, 85 kg.