„Nú verður leikið sóknargolf sem aldrei fyrr“

Þrátt fyrir að spila mikið betur í gær en í fyrradag er íslenska landsliðið á Evrópumóti áhugamanna í golfi í slæmum málum. Keppikefli þeirra í dag og á morgun er það helst að ná sautjánda sætinu sem er síðasta sætið til að tryggja þátttökurétt á mótinu að ári. Strákarnir sex í liðinu ætla sér að leika djarft í dag og mottó dagsins er sóknargolf og aftur sóknargolf.

„Nú snýst þetta eingöngu um sóknargolf og að koma í veg fyrir að Ísland falli úr keppninni,“ segir Hlynur Geir Hjartarsson, einn þeirra sex Íslendinga sem keppa á Evrópumóti áhugakylfinga sem fram fer á Ítalíu.

Þriðji keppnisdagurinn hefst í dag og er keppt í holukeppni í stað höggleiks eins og raunin var fyrstu tvo daga mótsins en strákarnir vilja eflaust gleyma þeim sem fyrst enda var fyrsti dagurinn ekkert annað en stórslys að mati fararstjóra liðsins, Ragnars Ólafssonar.

Fyrir daginn er Ísland í átjánda sætinu af tuttugu þjóðum alls en liðið skipa þeir Hlynur Geir Hjartarsson, Ólafur Björn Loftsson, Sigmundur Einar Másson, Kristján Þór Einarsson, Sigurþór Jónsson og Stefán Már Stefánsson. Keppir Ísland síðustu tvo dagana á móti Sviss, Eistlandi og Póllandi um eina lausa sætið sem eftir er og hefja íslensku strákarnir leik um klukkan níu að íslenskum tíma.

Í hnotskurn

» Strákarnir hefja leik í dag kl. 9 að íslenskum tíma og hægt er að fylgjast með gangi mála á www.golfbox.dk.
» Ólafur Björn Loftsson er sá eini strákanna hingað til sem spilað hefur vel. Var hann í 14. sæti í einstaklingskeppninni á fimm höggum undir pari fyrir daginn í dag.
» Sigurþór Jónsson hefur átt daprastan leik hingað til og er sextán höggum yfir pari að tveimur dögum loknum.