Snýr Tiger aftur í þessum mánuði?
Tiger Woods hefur legið undir feldi síðan í nóvember. Reuters
Vefur breska ríkisútvarpsins, BBC greindi frá því í dag að efsti kylfingur heimslistans, Tiger Woods hafi sett stefnuna á að snúa aftur á golfvöllinn hinn 17. febrúar næstkomandi.
Þá fer fram Heimsmótið í holukeppni í Arizona og samkvæmt BBC eru líkur á því að Tiger verði þar á meðal keppenda en vitnað er í frétt ástralska blaðsins The Melbourne Herald Sun. Samkvæmt heimildum Ástralanna hefur fyrirtæki Tigers sett sig í samband við mótshaldara í Arizona. Í heimsmótinu fá 64 efstu kylfingar heimslistans sjálfkrafa þáttökurétt og þurfa að staðfesta þáttöku í síðasta lagi 12. febrúar. Í ljósi þess að Tiger hefur ekki látið sjá sig á opinberum vettvangi síðan í nóvember þá gefur auga leið að mótshaldarar þurfa drjúgan tíma til þess að undirbúa sig fyrir þann fjölmiðlasirkus sem myndi fylgja endurkomu Tigers.
