Kylfingar gagnrýna Tiger

Suður-afríski kylfingurinn Ernie Els sagði í dag, að það lýsti sjálfselsku Tigers Woods að hann áformar að gefa opinbera yfirlýsingu um einkalíf sitt og feril á morgun á sama tíma og mikilvægt golfmót stendur sem hæst í Arizona í Bandaríkjunum.

„Þetta er sjálfselska," sagði Els við vef Golf Week. „Ég kenni í brjósti um þá sem kosta mótið. Það er ágætt að koma með yfirlýsingar á mánudögum en ekki föstudögum. Það dregur athyglina frá golfmótunum." 

Ráðgjafafyrirtækið Accenture er helsti styrktaraðili mótsins í Arizona en fyrirtækið rifti auglýsingasamningi við Woods eftir að kvennamál hans komu upp á yfirborðið.  

Golf Week hefur eftir öðrum ónafngreindum kylfingi, að engu sé líkara en að Woods sé að ná sér niðri á Accenture.  

Mark Steinberg, umboðsmaður Woods, sagði hins vegar við Golf Week, að blaðamannafundur Woods hefði verið ákveðinn í samráði við Accenture og fyrirtækið hefði stutt hann heilshugar. 

Steinberg sagði í gærkvöldi, að Woods vildi á fundinum ræða um  hvernig hann ætlaði að bæta ráð sitt. Hann lagði hins vegar áherslu á að ekki væri um að ræða blaðamannafund og þótt völdum hópi blaðamanna yrði boðið að vera viðstaddur yrðu spurningar ekki leyfðar.  

Golfumboðsmaður, sem vildi ekki láta nafns síns getið, sagði við golfblaðið í gærkvöldi, að ef Woods vildi ekki svara spurningum gæti hann ekki vonast til þess að ljúka málinu því mörgum spurningum væri enn ósvarað.  

Ernie Els. Reuters