Keppir Woods 25. mars?

Tiger Woods les upp yfirlýsingu í febrúar. Reuters

Bandaríska dagblaðið New York Post segir, að kylfingurinn Tiger Woods sé að búa sig undir að taka þátt í Arnold Palmer boðsmótinu í golfi sem hefst 25. mars.

Blaðið hefur eftir tveimur ónafngreindum heimildarmönnum í golfheiminum, að Woods hefði ráðið Ari Fleischer, fyrrum blaðafulltrúa Georges W. Bush til að skipuleggja endurkomu sína. Fleischer rekur ráðgjafarfyrirtæki fyrir atvinnuíþróttamenn.

Woods tók sér hlé frá keppni í nóvember eftir að upp komst að hann hefði átt vingott við margar konur þótt hann sé giftur og eigi tvö ung börn. Woods hefur komið einu sinni fram opinberlega til að biðjast afsökunar en hann sagðist þá ekki vita hvenær hann myndi hefja keppni á ný.

Arnold Palmer mótið fer fram á Bay Hill golfvellinum í Orlando, skammt frá heimili Woods, sem hefur unnið þetta mót sex sinnum.