Aðeins þrír Íslendingar hafa sigrað á háskólamóti

Ólafur Björn Loftsson. mbl.is/Sigurður Elvar/golf@mbl.is

Eftir Kristján Jónsson, kris@mbl.is

Ólafur Björn Loftsson, Íslandsmeistari úr Nesklúbbnum, sýndi allar sínar bestu hliðar og sigraði á Rio Pinar Invitational-háskólamótinu í golfi á Flórída á þriðjudagskvöldið. Ólafur steig varla feilspor í mótinu og lék hringina þrjá á samtals sjö höggum undir pari. Aðeins þrír Íslendingar hafa sigrað á háskólamóti í golfi.

Spilaðar voru 36 holur á mánudaginn og þá lék Ólafur á 71 og 70 höggum við erfiðar aðstæður. Ólafur tjáði Morgunblaðinu að þá hafi verið mjög hvasst og menn hafi átt fullt í fangi með að halda boltanum í leik á þröngum skógarvellinum. „Þetta var frábært mót og alveg virkilega gaman. Það var svakalega spennandi lokadagurinn og alveg ótrúlega gaman að ná sínum fyrsta sigri í 1. deildinni í háskólagolfinu. Þetta er alveg frábært“ sagði Ólafur þegar Morgunblaðið sló á þráðinn til hans í gær.

Eftir því sem Morgunblaðið kemst næst hafa aðeins tveir Íslendingar sigrað á háskólamóti í golfi. Sá fyrsti var Úlfar Jónsson, sem sigraði á móti á lokaári sínu í háskóla. Þess ber einnig að geta að Úlfari var sýndur sá mikli heiður að vera valinn All American á háskólaárum sínum. Nokkrir íþróttamenn á landsvísu úr nokkrum greinum háskólaíþrótta eru valdir árlega. Sigmundur Einar Másson hefur einnig sigrað á háskólamóti og er jafnframt sá eini sem hefur sigrað tvívegis á slíkum mótum.