PGA breytir reglum vegna frávísunar Furyk

Jim Furyk. Reuters

Forráðamenn PGA mótaraðarinnar í golfi hafa breytt reglum vegna mætingaskyldu kylfinga á „æfingamót“ sem ávallt eru haldin á miðvikudögum eða degi áður en keppni hefst á fjögurra daga PGA-mótum. Þessi mót eru haldin í samstarfi við styrktaraðila hvers móts fyrir sig og keppendur á mótinu eru skyldugir að mæta til leiks.

Á miðvikudaginn í síðustu viku mætti bandaríski kylfingurinn Jim Furyk aðeins of seint til leiks í „æfingamótið“ og var hann í kjölfarið vísað úr keppni á Barclays Classic meistaramótinu og missti hann þar með af tækifæri til þess að blanda sér í baráttuna um mikilvæg stig í Fed-Ex úrslitakeppninni.

Tim Finchem framkvæmdastjóri PGA mótaraðarinnar sagði í gær að kylfingar sem mæti framvegis of seint á þessi „æfingamót“ fái að „stinga“ sér inn í sinn ráshóp en þeir þurfa að taka að sér önnur verkefni sem snúa að styrktaraðilum á því móti. Þeir sem mæta alls ekki til leiks á „æfingamótin“ verða að sætta sig við að fá ekki að taka þátt á viðkomandi PGA-móti.