Sigraði á golfmóti en dæmdi sig úr keppni

Aðeins er leyfilegt að vera með 14 kylfur í golfpokanum. mbl.is

Zach Nash, fjórtán ára gamall bandarískur kylfingur, er áberandi á stærstu fréttamiðlum heimsins í dag eftir að hann dæmdi sjálfan sig úr keppni á golfmóti sem hann hafði unnið.

Nash sigraði á sterku unglingamóti í Wisconsins og þegar hann kom heim til sín eftir verðlaunaafhendinguna sá hann að það voru 15 kylfur í golfpokanum en aðeins er leyfilegt að vera með 14 kylfur í golfpokanum.

Nash hafði sjálfur frumkvæði að því að hafa samband við mótsstjórnina og hann skilaði síðan verðlaununum eftir að hann var dæmdur úr keppni. „Ég vissi það um leið og ég uppgötvaði mistökin að ég gæti ekki lifað með því að taka við verðlaunum og hafa rangt við. Þetta var ekki erfið ákvörðun,“  sagði Nash við AP fréttastofuna.