Fimleikar og golf á Smáþjóðaleikunum á Íslandi

Íslenskir kylfingar fá tækifæri til að spreyta sig á Smáþjóðaleikum. mbl.is/Kristinn

Ákveðið var á fundi framkvæmdastjórnar Smáþjóðaleikanna í dag að þegar leikarnir fara fram á Íslandi árið 2015 verði viðbótargreinar leikanna áhaldafimleikar og golf.

Samkvæmt reglum Smáþjóðaleikanna er keppt í ákveðnum greinum á hverjum leikum en gestgjafarnir hverju sinni hafa möguleika á að bæta við tveimur greinum, svo framarlega sem lágmarksþátttaka næst, og framkvæmdastjórn leikanna þarf að samþykkja þær.

Framkvæmdastjórnin fundaði í Sochi í Rússlandi í dag, í tengslum við aðalfund Evrópusambands Ólympíunefnda, og þar voru greinarnar samþykktar.

Aðrar greinar á leikunum eru frjálsíþróttir, sund, júdó, skotíþróttir, borðtennis, tennis, körfuknattleikur, blak og strandblak.