Birgir Leifur á enn möguleika

Birgir Leifur lék afar vel í dag. mbl.is

Birgir Leifur Hafþórsson, kylfingur úr GKG, lék frábærlega á þriðja keppnisdegi á 2. stigi úrtökumóta fyrir Evrópumótaröðina í golfi en leikið er á Costa Ballena-vellinum í Jerez í suðurhluta Spánar.

Birgir Leifur lék á 68 höggum í dag, eða fjórum höggum undir pari, og er þar með samtals á pari eftir dagana þrjá en hann lék á fimm höggum yfir pari fyrsta daginn. Hann fékk engan skolla í dag en fugl á 8., 9., 10. og 12. holu.

Þar með er Birgir Leifur í 42.-46. sæti af 74 kylfingum en ætla má að 18 efstu kylfingarnir komist áfram. Kylfingarnir í 18.-23. sæti eru á fimm höggum undir pari og því þarf Birgir Leifur líklega að ná enn betri hring en í dag á lokakeppnisdeginum en ljóst er að hann á enn möguleika.