Birgir Leifur úr leik á Spáni

Birgir Leifur Hafþórsson. mbl.is/seth

Birgir Leifur Hafþórsson, kylfingur úr GKG, er úr leik í úrtökumótunum fyrir Evrópumótaröðina í golfi. Birgir lék síðasta hringinn á Costa Ballena á Spáni í dag á 71 höggi sem er eitt högg undir pari og lék því holurnar 72 á einu undir pari samtals.

Fáir hafa lokið leik í dag en Birgir er sem stendur í 41. sæti en liðlega 20 kylfingar komast áfram á lokastigið. Birgir verður sjálfsagt fjórum eða fimm höggum frá því þegar upp verður staðið.

Birgir lék þrjá hringi í mótinu undir pari þrátt fyrir allt, en skelfilegur fyrsti hringur setti stórt strik í reikninginn hjá Skagamanninum. Hann lék Birgir á 77 höggum en annan og fjórða hringinn lék hann á 71 höggi og þriðji hringurinn var frábær: 68 högg.