Tígurinn er enn svangur
Tiger Woods glaður með sigurlaunin. Reuters
Bandaríski kylfingurinn Tiger Woods fagnaði sigri á Chevron- mótinu sem lauk seint á sunnudagskvöldið í Kaliforníu. Ekki var um stórt mót að ræða, og það tilheyrir ekki PGA-mótaröðinni, enda er desember rólegur mánuður í golfinu og þá eru úrtökumótin að klárast fyrir mótaraðirnar árið 2012.
Engu að síður er um merkileg tímamót að ræða því sigurinn var sá fyrsti hjá Tiger í rúm tvö ár. Hann sigraði síðast í Ástralíu haustið 2009, skömmu áður en veröld hans svo gott sem hrundi og í kjölfarið fylgdi líklega meira fjölmiðlafár vegna einkalífs íþróttamanns en við höfum áður orðið vitni að.
Á þessum tveimur árum sem liðin eru í kjölfar kynlífshneykslis og skilnaðar hefur fátt markvert gerst hjá Tiger á golfvellinum. Staða hans gerbreyttist og hann þurfti að kynnast nýjum aðstæðum sem keppandi. Hann hafði vanist því að vera allra manna vinsælastur á golfvellinum og fékk ávallt mikinn stuðning frá áhorfendum. Skyndilega var hann orðinn óvinsæll og andrúmsloftið í kringum hann í mótum orðið allt annað. Hafði þetta einnig mikil áhrif á keppinauta hans.
Sjá ítarlega fréttaskýringu um Tiger Woods í Morgunblaðinu í dag
