McIlroy í veikindafrí?

Rory McIlroy. Reuters

Rory McIlroy, kylfingurinn ungi og magnaði frá Norður-Írlandi, berst við ofþreytu og slappleika og gæti þurft að taka sér frí frá golfinu eftir að heimsmótinu í Dubai lýkur um helgina.

Fréttastofa Reuters hefur þetta eftir talsmanni Norður-Írans sem segir að búið sé að vara forsvarsmenn taílenska meistaramótsins við því að ekki sé víst að hann mæti til leiks þar í næstu viku eins og fyrirhugað var.

Talsmaðurinn, sem ekki vildi koma fram undir nafni, sagði að McIlroy hefði verið veikur undanfarið, hann væri undir stöðugu eftirliti lækna og yrði skoðaður vel að keppni lokinni á morgun, laugardag. Þá yrði ákvörðun tekin um framhaldið.

McIlroy er fjórði eftir fyrsta daginn í Dubai en hann þarf að vinna mótið og treysta á að Luke Donald verði ekki ofar en í níunda sæti til að verða besti kylfingur Evrópu árið 2011.

„Læknarnir hafa fyrirskipað Rory að æfa ekki neitt og fara ekki í ræktina. Hann er í lagi en verður að halda orkunni. Þetta er vírus og hann þarf sinn tíma til að losna við hann. Þeir vita ekki hvaðan hann kemur en svona vírusar geta haft hægt um sig um skeið og síðan blossað upp að nýju. Hann kemst ekki hjá því að vera úti í sólinni í sex tíma á dag í golfinu en verður síðan að halda sig innandyra. Rory segir að svo framarlega sem hann sofi vel, sé hann hress á morgnana og í byrjun keppni, en innan klukkutíma fari hann að þreytast og þurfi að hvíla sig," sagði talsmaðurinn um ástandið á kylfingnum.