Poulter hæstánægður með sláttinn

Ian Poulter brosmildur á 18. holunni í Ástralíu. Reuters

Hinn litskrúðugi enski kylfingur Ian Poulter sigraði á JBWere-meistaramótinu í golfi sem fram fór í Ástralíu. Poulter lék samtals á 269 höggum eða 15 höggum undir pari eða þremur höggum á undan Marcus Fraser frá Ástralíu. Geoff Ogilvy frá Ástralíu endaði í þriðja sæti á 273 höggum, höggi á eftir Fraser.

Heimamaðurinn Ogilvy var með tveggja högga forystu á Poulter fyrir lokahringinn, en hann lék þriðja hringinn á átta höggum undir pari og sagði eftir þann hring: „Ég kann vel við mig hér í Melbourne og þetta er líklegast sá völlur sem ég hef spilað hvað oftast í gegnum tíðina og hér líður mér alltaf mjög vel.“

En það er greinilega ekki nóg að þekkja völlinn út og inn því Ogilvy lék síðasta hringinn á 73 höggum, eða tveimur höggum yfir pari og varð að sætta sig við þriðja sætið. Poulter lék hins vegar við hvurn sinn fingur á lokahringnum og var ánægður í lok dags: „Ég sló mjög vel og hitti venjulega á þá staði sem ég ætlaði mér þannig að ég er mjög ánægður með hvernig ég spilaði,“ sagði Poulter. Luke Donald lék á 4 höggum undir pari og endaði í 12. sæti. skuli@mbl.is