Westwood er fullur sjálfstrausts

Lee Westwood fagnar sigrinum í Tælandi. Reuters

Enski kylfingurinn Lee Westwood sigraði á Meistaramóti Tælands um helgina, lék á 22 höggum undir pari, sjö höggum betur en Charl Schwartzel frá Suður-Afríku. Þriðji varð síðan Michael Thompson frá Bandaríkjunum á 14 höggum undir pari.

Westwood fór á kostum fyrstu tvo hringina í mótinu þegar hann lauk leik á fyrsta hring á 60 höggum, 12 höggum undir pari og annan hringinn lék hann á 64 höggum, eða átta höggum undir pari og var því samtals á 20 höggum undir pari eftir tvo hringi.

Þriðja hringinn lék sá enski hins vegar á einu höggi yfir pari en Schwartzel lék annan og þriðja hring á 66 höggum og var því aðeins fjórum höggum á eftir Westwood fyrir lokahringinn. En hann náði sér ekki á strik á honum og lék á pari á meðan Westwood lék á þremur höggum undir pari. „Ég er ánægður hvernig ég klára árið. Ég er fullur sjálfstrausts og vonandi verður það líka þannig þegar ég byrja á nýjan leik á nýju ári. Ég var ekkert ánægður með lokahringinn, en hann dugði,“ sagði Westwood eftir sigurinn í Tælandi. skuli@mbl.is