„Gefur mér byr undir báða vængi“
Tinna Jóhannsdóttir. mbl.is/gsi
„Ég er mjög sátt. Ég var reyndar sprungin andlega í dag. Maður hefur verið að þjösnast áfram og halda sér á meðal þeirra efstu. Ég kom ekki í þetta mót til að vinna það heldur að halda mér inni til að komast í næsta mót. Ég gerði það og er því bara ánægð,“ sagði Tinna Jóhannsdóttir úr Keili þegar Morgunblaðið náði sambandi við hana að loknum síðasta hringnum á úrtökumótinu fyrir Evrópumótaröðina í golfi.
Tinna hafnaði í 13.-14. sæti í mótinu af 102 kylfingum og komst örugglega áfram á lokamótið en 35 efstu kylfingarnir unnu sér inn þátttökurétt á því móti. Það mun einnig fara fram á La Manga á Spáni og verður leikið á sömu tveimur völlunum og í úrtökumótinu sem Tinna komst nú í gegnum.
Tinna lék síðasta hringinn í gær á 78 höggum en var engu að síður sex höggum á undan þeim kylfingum sem náðu síðustu sætunum sem dugðu til að komast áfram. Tinna lék hringina fjóra á 74, 71, 71 og 78 höggum. Tinna fór ekki að gefa eftir fyrr en á síðustu níu holunum í mótinu en þá var orðið ljóst að einungis stórslys gæti orðið til þess að hún missti af lokamótinu.
Fyrri níu holurnar í gær lék hún á tveimur yfir pari en seinni níu á fimm yfir pari og fékk skramba á 10. holu sem var eina holan sem hún spilaði á verra skori en skolla. Þar fékk hún víti þegar boltinn hreyfðist við það að hún lagði kylfuna niður. Spilamennska hennar var því mjög stöðug en það er einmitt lykillinn að því að ná árangri á úrtökumótum sem þessum.
Nánar er rætt við Tinnu í íþróttablaði Morgunblaðsins í dag.
