Tinna á fimm yfir eftir fyrsta hring

Tinna Jóhannsdóttir lék betur á seinni níu holun á La Manga á Spáni. Ljósmynd/Jón Júlíus Karlsson Víkurfréttir

Tinna Jóhannsdóttir, kylfingur úr Keili, lauk fyrsta hring á loka-úrtökumóti fyrir Evrópumótaröðina á fimm höggum yfir pari eða 76 höggum. Tinna var á fjórum yfir pari eftir fyrri níu holurnar en lék síðari níu á einu yfir.

Mótið fer fram á tveimur völlum á La Manga á Spáni en Tinna lék á norðurvellinum í dag. Hún fékk tvo fugla, fimm skolla og einn tvöfaldan skolla. Ljóst er að Tinna þarf að leika mun betur ætli hún að enda á meðal 50 efstu kylfinganna að loknum fjórum keppnisdögum þegar kemur að niðurskurðinum fyrir síðasta keppnisdaginn. Nái hún því þarf hún svo að vera á meðal 30 efstu til að taka þátt á flestum mótunum á evrópsku mótaröðinni.    

Tinna er jöfn fjórum öðrum kylfingum í 80. sæti af 101 keppanda eftir fyrsta hring. Þeir kylfingar sem eru í kringum 30. sætið eru á einu höggi yfir pari en ekki hafa allir keppendur lokið leik.