Tiger gaf eftir og Rock vann óvæntan sigur

Robert Rock með verðlaunagripinn. Reuters

Ekki tókst Tiger Woods að vinna sitt fyrsta mót í tvö ár eins og stefndi í á tímabili á HSBC-meistaramótinu í Abu Dhabi sem lauk í dag en mótið er hluti af Evrópumótaröðinni. Englendingurinn Robert Rock fagnaði óvæntum sigri en hann lék hringina fjóra á 273 höggum eða á samtals 13 höggum undir pari.

Rock er nær óþekktur kylfingur og er í 117. sæti á heimslistanum og sigur hans kom því öllum á óvart. Hann og Tiger Woods voru jafnir fyrir lokahringinn á 11 höggum undir parinu og reiknuðu flestir með því að Tiger myndi loks fagna sigri en Rock sýndi mikinn styrk og sigraði.

N-Írinn Rory McIlroy varð í öðru sæti á 276 höggum og þeir Thomas Björn frá Danmörku, Tiger Woods og N-Írinn Graeme McDowell komu næstir á 277 höggum.