John Daly lék við hvern sinn fingur

John Daly. Reuters

Rokkstjarna golfsins, John Daly, lék við hvern sinn fingur á fyrsta hring á Katar Masters á Evrópumótaröðinni í morgun og er í 2. sæti. 

Daly lék á 67 höggum sem er fimm höggum undir pari vallarins. Hann er einn í 2. sæti, einu höggi á eftir efsta manni, Gonzalo Fdez-Castano frá Spáni. 

Skorkortin eru oft skrautleg hjá Daly sem tekur gjarnan mikla áhættu í leik sínum en að þessu sinni fékk hann einfaldlega 13 pör og 5 fugla. 

Forvitnilegt verður að sjá hvernig Daly fylgir þessari góðu byrjun eftir en honum veitir ekki af góðum árangri því hann er ekki með keppnisrétt á stærstu mótaröðunum og þarf að treysta á boð frá styrktaraðilum og mótshöldurum.

Daly var alsæll með þessa byrjun á Twitter í dag og líkaði vel að spila við þær aðstæður sem eru í Katar. Hann bætti því við í annarri færslu síðar í dag að hann væri búinn að verða sér úti um Häagen-Dazs-ís og virtist ekki síður ánægður með það.