Tíu bestu golfvellir Íslands?

Jóhann Pálsson slær flatirnar á Hvaleyrarvelli og tíkin Ásta er með í för. mbl.is/Golli

Breska vefsíðan Top 100 golf courses of the world hefur raðað tíu bestu golfvöllum Íslands eftir gæðamati síðunnar en þessi sama vefsíða var á dögunum með Hvaleyrarvöll á lista yfir 100 bestu golfvelli Evrópu utan Bretlandseyja.

Frá þessu er greint á vefmiðlinum iGolf.is. Hvaleyrarvöllur er eðlilega í 1. sæti þar sem hann var eini íslenski völlurinn á topp 100-listanum og raunar fyrsti íslenski völlurinn til að komast inn á slíka lista en ýmsir fjölmiðlar í golfheiminum taka slíka lista saman. 

Hjá iGolf kemur fram að Frakkinn Cédric Etienne Hannedouche hafi séð um úttektina á íslensku völlunum en hann bjó hérlendis í fimm ár og er með íslenskan ríkisborgararétt. 

Margir glæsilegir níu holu golfvellir eru á Íslandi en enginn þeirra er á umræddum topp 10-lista og því má draga þá ályktun að miðað hafi verið við 18 holu velli í úttektinni.