Kristján og Guðrún eru í toppsætunum

Kristján Þór Einarsson úr Kili í Mosfellsbæ og Guðrún Brá Björgvinsdóttir úr Keili eru efst á stigalistum Eimskipsmótaraðarinnar í golfi eftir Íslandsmótið í holukeppni sem lauk á Hvaleyrarvellinum á sunnudaginn.

Kristján er kominn með 4.754 stig í karlaflokki eftir að hann hreppti Íslandsmeistaratitilinn í holukeppninni. Bjarki Pétursson úr GB, sem tapaði fyrir honum í úrslitaleiknum, er annar með 4.048 stig. Gísli Sveinbergsson úr Keili er þriðji með 3.312,50 stig.

Guðrún Brá, sem varð fjórða í holukeppninni, varð önnur á tveimur fyrstu mótum tímabilsins og er efst þótt hún hafi ekki unnið mót í sumar. Hún er með 4.537,50 stig. Sunna Víðisdóttir úr GR, sem hefur unnið tvö mótanna, er önnur með 4.432,50 stig og Berglind Björnsdóttir úr GR er þriðja með 4.327,50 stig.