Kylfingurinn Valdís Þóra Jónsdóttir er komin til Ástralíu þar sem hún tekur þátt í fyrsta móti keppnistímabilsins á Let Evrópumótaröð kvenna sem hefst á fimmtudaginn.
Valdís Þóra tryggði sér keppnisrétt á sterkustu atvinnumótaröð kvenna í Evrópu í desember með frábærum árangri á lokaúrtökumótinu þar sem hún hafnaði í öðru sæti.
„Aðstæður hérna í Ástralíu eru mjög góðar, vellirnir eru í góðu ástandi, en það eru miklar líkur á því að vindurinn blási hressilega þar sem vellirnir liggja við sjóinn. Ég þarf því að pæla mikið í vindinum í höggunum mínum og einnig á flötunum. Ég er með ákveðin markmið fyrir þetta mót en ég held þeim fyrir mig,“ segir Valdís Þóra við golf.is
Oates Vic mótið fer fram á tveimur völlum, Beach og Creek, og þar mæta til leiks margir af bestu kylfingum heims. Keppnin hefst á fimmtudaginn og verða leiknir fjórir hringir.