Birgir Leifur ráðinn íþróttastjóri Leynis

Guðmundur Sigvaldason framkvæmdastjóri Leynis, Birgir Leifur Hafþórsson íþróttastjóri Leynis og …
Guðmundur Sigvaldason framkvæmdastjóri Leynis, Birgir Leifur Hafþórsson íþróttastjóri Leynis og Þórður Emil Ólafsson formaður Leynis. Ljósmynd/Leynir

Birgir Leifur Hafþórsson atvinnukylfingur og sjöfaldur Íslandsmeistari í golfi hefur verið ráðinn íþróttastjóri hjá Golfklúbbnum Leyni á Akranesi og mun hann hafa yfirumsjón með allri þjálfun hjá Golfklúbbnum Leyni. Þetta kemur í fréttatilkynningu frá golfklúbbnum Leyni.

Í fréttatilkynningu kemur fram;

„Birgir Leifur mun vinna sem íþróttastjóri samhliða atvinnumennsku í golfi á Áskorendamótaröðinni (European Challenge Tour) þar sem hann er með keppnisrétt.

Birgir Leifur starfaði nú síðast hjá GKG og mun samhliða störfum sínum fyrir Golfklúbbinn Leyni áfram spila og keppa undir merkjum GKG. Birgir Leifur er menntaður PGA golfkennari frá PGA golfkennaraskólanum á Íslandi en hann lauk golfkennaranámi árið 2012.

Birgi Leif þarf vart að kynna en hann er alinn upp á Akranesi og spilaði undir merkjum Golfklúbbsins Leynis allt til ársins 1997 er hann gekk til liðs við GKG m.a. vegna íþróttastefnu þess klúbbs á þeim tíma. Undanfarin ár hefur Birgir Leifur tekið virkan þátt í uppbyggingu á öflugu íþróttastarfi GKG og öðlast dýrmæta reynslu í hvernig hægt er að byggja upp gott íþróttastarf.“

„Ég hlakka mikið til að fá að taka þátt í að móta og byggja upp íþróttastarf míns gamla heimaklúbbs GL samhliða því að vera í atvinnumennskunni.  Á Akranesi er mikil íþróttahefð og hefur bæjarfélagið og stjórn GL mikinn metnað að móta aðstæður sem eru til fyrirmyndar og munu auðvelda að gera gott starf enn betra,“ segir Birgir Leifur.

mbl.is
Fleira áhugavert
Fleira áhugavert