Fjórir kylfingar eru efstir og jafnir eftir tvo hringi á Masters-mótinu í golfi á Augusta National-golfvellinum í Bandaríkjunum.
Bandaríkjamennirnir Charley Hoffman og Ricky Fowler, Spánverjinn Sergio Garcia og Belginn Thomas Pieters, sem er nýliði á Masters-mótinu, eru allir fjórum höggum undir pari og það stefnir í harðan slag um sigurinn í ár en líkt og í gær gerði vindurinn kylfingunum lífið leitt.
Hoffman, sem var með góða forystu eftir fyrsta hringinn sem hann lék á sjö höggum undir pari, missti flugið í dag og lauk keppni á þremur höggum yfir pari.
Fowler og Pieters léku hins vegar afar vel í dag og kláruðu báðir hringinn á fimm höggum undir parinu.
Bandaríkjamaðurinn William McGirt og Englendingurinn Justin Rose koma næstir á eftir þessum fjórum, eru á tveimur undir pari.
Bandaríkjamaðurinn Phil Mickelson missti taktinn á lokaholunum en hann var samtals tveimur höggum undir pari þegar hann átti þrjár holur eftir. Mickelsen lék á einu höggi yfir parinu og er samtals á pari og það er einnig Ástralin Adam Scott, sigurvegarinn á Masters-mótinu árið 2013.
N-Írinn Rory McIlroy, sem er annar á heimslistanum, lék á pari í dag og er samtals á einu höggi yfir pari.