Valdís Þóra Jónsdóttir, kylfingur úr Leyni, lék lokahringinn á Lalla Meryem-mótinu í golfi á 77 höggum eða fimm höggum yfir pari vallarins í dag. Valdís Þóra lék fyrri níu holurnar á pari vallarins, en fataðist flugið á seinni níu holunum þar sem hún lék á fimm höggum yfir pari vallarins.
Valdís Þóra lék hringina fjóra á mótinu á samtals níu höggum yfir pari og hafnaði í 50. sæti á mótinu. Mótið sem leikið var á Golf Dar Es Salam-vellinum í Marokkó er annað mótið á Evrópumótaröðinni sem er næst sterkasta mótaröðin í golfi kvenna á eftir LPGA.
Valdís Þóra lenti í 51. sæti á fyrsta móti mótaraðarinnar, Oates Victorian-mótinu sem fór í Ástralíu. Valdís Þóra lék á einu höggi yfir pari vallarins á fyrsta mótinu í Ástralíu.
Það er skammt stórra högga á milli hjá Valdísi Þóru, en hún verður meðal þátttakenda á þriðja móti Evrópumótaraðarinnar, Estralla Damm Mediterranean-mótinu, sem fram fer á Club De Golf Terramar-vellinum á Spáni og hefst á fimmtudaginn næstkomandi.