Ólafía Þórunn Kristinsdóttir hefur ekki farið vel af stað á fyrsta hringnum á Volunteers of America Texas Shootout-mótinu í golfi, sem er hluti af LPGA-mótaröðinni, í Texas í Bandaríkjunum.
Eftir níu holur er Ólafía á þremur höggum yfir pari og þarf að herða sig á síðari níu holunum á þessum fyrsta hring. Ólafía er í ráshópi með Dori Carter frá Bandaríkjunum og Giula Molinaro frá Ítalíu fyrstu tvo keppnisdagana.
Mótið er sérstakt að því leyti að keppendum er fækkað tvisvar. Að vanda komast um 70 efstu áfram eftir fyrstu tvo dagana, en eftir þriðja hringinn á laugardaginn komast 50 efstu áfram og spila lokahringinn á sunnudaginn. Meðal keppenda eru allir sem eru í efstu 20 sætum heimslistans.