Atvinnukylfingurinn og Íslandsmeistarinn úr GR, Ólafía Þórunn Kristinsdóttir, átti góðan lokadag á fjórða og síðasta hringnum á Volvik-meistaramótinu í golfi í LPGA-mótaröðinni en leikið er í Detroit í Michigan.
Ólafía lék á tveim höggum undir pari í dag og hringina fjóra samtals á þrem höggum undir pari vallarins. Ólafía fékk fimm fugla og þrjá skolla á nokkuð skrautlegum hring. Hún fékk aðeins par í þrígang á fyrri níu holunum, en par á öllum nema tveim holum á seinni níu.
Hún var í 56. sæti þegar hún lauk leik í dag, en ekki höfðu allir kylfingar klárað sinn hring og gæti það því breyst.
Fylgst var með gangi mála í beinni textalýsingu á mbl.is.