Framtíðin er tryggð og björt

Ólafía Þórunn Kristinsdóttir þarf ekki lengur að hafa áhyggjur af því hvernig næsta keppnistímabil kemur til með að líta út.

Eftir magnaðan árangur á LPGA-móti í Indianapolis um helgina, þann besta hjá íslenskum kylfingi, flaug Ólafía upp peningalistann mikilvæga á mótaröðinni og ætti að geta gengið að því sem vísu að fá fullan keppnisrétt á mótaröðinni aftur á næsta ári.

Ólafía hafnaði í 4. sæti á mótinu um helgina, á samtals 13 höggum undir pari. Hún náði sér með sérlega glæsilegum hætti í örn á lokaholunni, á þriðja og síðasta keppnisdeginum, sem skilaði henni sex sætum ofar en ella. Aðeins bandaríska golfstjarnan Lexi Thompson (-19), hin nýsjálenska Lydia Ko (-15) og hin ástralska Minjee Lee (-14) enduðu ofar.

Fjórða sætið gaf Ólafíu 102.909 Bandaríkjadali í verðlaun, eða um 10,9 milljónir króna. Segja má að örninn á lokaholunni hafi fært henni 6,6 milljónir aukalega, því fyrir 10. sæti fengust 4,3 milljónir.

Þetta verðlaunafé er ekki aðeins ágæt búbót fyrir Ólafíu heldur kemur það henni upp LPGA-listann, þar sem kylfingum er einfaldlega raðað eftir því hve miklu verðlaunafé þeir safna yfir tímabilið. Efstu 100 fá svokallaðan „fullan keppnisrétt“ á næsta tímabili, rétt eins og Ólafía hefur nú eftir að hafa þrætt nálaraugað á úrtökumótinu síðasta vetur. Ólafía komst um helgina úr 101. sæti í 67. sæti peningalistans, og hefur samtals safnað 174.999 Bandaríkjadölum. Kylfingurinn í 100. sæti er með 91.223 dali, nú þegar níu mót af 34 sem gefa verðlaunafé eru eftir á þessu keppnistímabili.

Nánar í íþróttablaði Morgunblaðsins í dag.