Aldrei ofar á heimslista

Ólafía Þórunn Kristinsdóttir úr GR er í 179. sæti nýs heimslista í golfi og hefur aldrei verið ofar. Hún fór upp um fimm sæti frá síðasta lista með því að ná 35. sæti á LPGA-móti í Kína um helgina. Möguleikar hennar á að komast á Ólympíuleikana í Tókýó árið 2020 virðast afskaplega góðir, en mikið vatn á eftir að renna til sjávar.

Ólafía er í 23. sæti lista yfir bestu kylfinga Evrópu. Alls eru sjö Norðurlandabúar fyrir ofan Ólafíu á heimslistanum. Athygli vekur að af þeim 178 kylfingum sem eru fyrir ofan Ólafíu á heimslistanum koma hvorki fleiri né færri en 66 frá Suður-Kóreu. Bandaríkin eiga 33 í þessum hópi og Japan 32. Þessar þjóðir skera sig úr í golfi kvenna en efst á heimslista er þó Shanshan Feng frá Kína.

Fyrir ári var Ólafía í 614. sæti á heimslistanum, svo hún hefur flogið upp um 435 sæti á aðeins einu ári með góðum árangri á sínu fyrsta keppnistímabili á LPGA-mótaröðinni.

Lofar góðu varðandi Ólympíuleika

Í þessu sambandi má velta vöngum yfir möguleikum Ólafíu á að komast á Ólympíuleikana í Tókýó, þó að enn sé langt í þá, því að heimslistinn ræður því hvaða 60 kylfingar taka þar þátt í golfkeppni kvenna. Ef reglur um það hverjar komast á Ólympíuleikana verða þær sömu og fyrir ÓL í Ríó er útlitið afar gott fyrir Ólafíu. Hafa ber þó í huga að fyrir ÓL í Ríó gilti aðeins árangur síðustu tveggja ára fyrir leikana. Með sama hætti myndi því árangur vegna ÓL í Tókýó ekki fara að telja fyrr en næsta sumar.

Kvóti er á fjölda kylfinga frá hverri þjóð sem mega keppa á Ólympíuleikum. Suður-Kórea, Japan og Bandaríkin geta þannig í mesta lagi sent fjóra kylfinga hvert. Reglan er sú að þjóð megi að hámarki senda fjóra kylfinga ef þeir eru í hópi 15 efstu á heimslista en annars að hámarki tvo. Þess vegna var til dæmis hin indverska Aditi Ashok með í Ríó þrátt fyrir að vera þá í 444. sæti heimlistans.

Jafnvel þó að Suður-Kórea, Japan og Bandaríkin ættu fjóra kylfinga hver þjóð í Tókýó yrðu enn 46 sæti laus á leikunum. Á heimslistanum nú eiga 18 þjóðir til viðbótar kylfing eða kylfinga í sæti fyrir ofan Ólafíu, en jafnvel þó að hver þessara þjóða fengi sæti fyrir tvo kylfinga yrðu enn 10 sæti laus og Ólafía fengi eitt þeirra, miðað við núverandi stöðu.