Ólafía Þórunn Kristinsdóttir hóf í nótt keppni á Drottningamótinu í golfi í Japan en þar keppir hún með Evrópuúrvalinu gegn úrvalsliði frá Japan, Kóreu og Ástralíu.
Ólafía Þórunn keppti í fyrsta leiknum með Carly Booth frá Skotlandi. Mótherjar þeirra voru Seon-Woo Bae og Jeong-Eun Lee frá Suður-Kóreu. Ólafía og Booth töpuðu leiknum 4/3.
Á fyrsta keppnisdegi fara fram átta leikir í fjórbolta þar sem tveir keppendur eru saman í liði og leika sínum bolta út holuna. Betra skor hjá liðinu telur á hverri holu. Á öðrum keppnisdegi fara fram níu tvímenningsleikir (singles) þar sem tveir keppendur mætast í holukeppni og leika sínum bolta út holuna.
Samanlagður stigafjöldi frá fyrstu tveimur keppnisdögunum ræður síðan því hvaða lið mætast í úrslitaleiknum á þriðja keppnisdeginum. Liðin sem leika til úrslita keppa í fjórum leikjum þar sem fjórmenningur (foursome) verður notaður, en þar leika tveir keppendur saman í liði og leika einum bolta til skiptis. Sami háttur verður í bronsleiknum á þriðja keppnisdeginum.