Guðrún lék fyrsta hring á 74

Guðrún Brá Björgvinsdóttir, úr Keili, lék fyrsta hringinn á 74 höggum á lokaúrtökumótinu fyrir Evrópumótaröðina, LET, í gær en leikið er í Marokkó. Guðrún þarf að gera betur næstu daga til að blanda sér í baráttuna um að komast inn á mótaröðina en þar er fyrir Valdís Þóra Jónsdóttir úr Leyni.

Guðrún var á tveimur höggum yfir pari vallarins og er í 68. sæti að loknum fyrsta degi en 104 kylfingar fengu keppnisrétt á lokamótinu. Guðrún komst í gegnum fyrsta stig úrtökumótanna í Marokkó í síðasta mánuði og lék þá mjög vel. 

25 efstu kylfingarnir í mótinu komast á Evrópumótaröðina á næsta ári. Guðrún er þremur höggum frá því eftir fyrsta keppnisdag. Leikið er á tveimur völlum og því verður meira að marka stöðuna eftir daginn í dag þegar allir kylfingarnir hafa leikið sitt hvorn hringinn á völlunum tveimur.

Lokaúrtökumótin eru gjarnan lengri og erfiðari en hefðbundin golfmót. Í þessu tilfelli verða leiknir fimm hringir og keppendafjöldi skorinn niður eftir fjóra hringi þegar kylfingarnir hafa leikið 36 holur á hvorum velli. Sextíu efstu fá að leika lokahringinn. 

• Blogga um frétt