Dagur Sigurðsson, framkvæmdastjóri Vals og fyrrverandi fyrirliði íslenska landsliðsins í handknattleik, verður næsti þjálfari þýska 1. deildar liðsins Füchse Berlin. Þetta hefur Morgunblaðið samkvæmt heimildum. Ekki hefur verið skrifað undir samninginn en fátt getur komið í veg fyrir að svo verði á næstu dögum samkvæmt sömu heimildum.
Ráðgert er að Dagur taki við þjálfun Füchse Berlin næsta sumar og leysi þá núverandi þjálfara, Jörn-Uwe Lommel, af hólmi. Lommel var tilkynnt á miðvikudag að starfskrafta hans væri ekki óskað lengur en út þessa leiktíð sem lýkur í maí.
Framkvæmdastjóri Füchse Berlin, Bob Hanning, var hér á landi fyrir þremur vikum og ræddi þá m.a. við Dag.
Jafnhliða starfi sínu hjá Füchse Berlin heldur Dagur áfram að stýra austurríska landsliðinu.
Sjá nánar í íþróttablaði Morgunblaðsins í dag.