Guðmundur Þórður: Frábær frammistaða allra

Guðmundur Þórður Guðmundsson, landsliðsþjálfari í handknattleik. Brynjar Gauti

„Frammistaða allra leikmanna var frábær, þeir heiður skilinn fyrir frábæran leik við afar erfiðar aðstæður," sagði Guðmundur Þórður Guðmundsson, landsliðsþjálfari í handknattleik, eftir sigur Íslands á Makedóníu í Skopje í kvöld, 29:26, í riðlakeppni Evrópumótsins í handknattleik. 

„Menn héldu sig fullkomlega við það skipulag sem lagt var upp með, bæði í vörn og sókn. Málið var að halda Makedóníumönnum niðri, láta þá aldrei ná frumkvæðinu og það tókst. Fyrri hálfleikur var frábær hjá okkur, ekki hvað síst varnarlega. Það sést best á því að þeir skora aðeins tíu mörk í fyrri hálfleik. Í síðari hálfleik höldum við frumkvæðinu lengst af en þegar heimamenn komust yfir um tíma þá sýndu mínir menn hvers þeir eru megnugir með því að komast yfir á nýjan leik. Slíkt er ekki heiglum hent á jafn erfiðum leikvelli og hér í Skopje," sagði Guðmundur sem bar lof á alla leikmenn sína fyrir vaska framgöngu. 

„Við megum hinsvegar ekki gleyma okkur í þessum frábæru úrslitum. Framundan er erfiður leikur við Eistlendinga á heimavelli á sunnudag. Það er lið sem við megum alls ekki vanmeta. Þeir náðu stigi gegn Makedóníu sem undirstrikar styrk landsliðs Eistlendinga," sagði Guðmundur Þórður Guðmundsson, landsliðsþjálfari í handknattleik.

Ítarlegt viðtal verður við Guðmund í íþróttablaði Morgunblaðsins í fyrramálið. Þá verður einnig fjallað um leikinn og rætt við nokkra leikmenn íslenska landsliðsins.