Nú er ég klár í að fara á fæðingadeildina

Pálmar Pétursson markvörður FH. www.fhingar.is

,,Nú er ég klár í að fara á fæðingadeildina. Konan gerði eins og ég bað hana um. Hún krosslagði fæturna og hélt í sér svo núna er bara rólegheit um helgina og barneignir," sagði Pálmar Pétursson markvörður FH við mbl.is eftir sigur FH gegn Haukum í N1-deildinni í handbolta í kvöld.

Eiginkona Pálmars er ófrísk og gengin nokkra daga fram yfir áætlaðan fæðingartíma og var Pálmar alls ekki viss um hvort hann næði að taka þátt í Hafnarfjarðarslagnum.

,,Þessi leikur þróaðist framan af alveg eins og síðustu tveir leikir á móti Haukunum. Í leikjunum tveimur gáfum við eftir á lokakaflanum enda Haukarnir ólseigir og gefast aldrei upp. En þegar ég leit á klukkuna og við vorum fjórum mörkum yfir þá vissi ég að við myndum hafa þetta. Ég sá glampann í augum á mönnum og það kom ekki til greina annað en að landa sigri,“ sagði Pálmar, sem átti góðan leik á milli stanganna.

,,Það var mikil grimmd í liðinu. Við hirtum flest fráköstin og vissum það að leikurinn myndi vinnast á vörninni sem og hann gerði. Þau voru svo sár töpin þrjú á móti Haukunum og vildum ekki upplifa það aftur. Þetta var rosalega mikilvægur sigur.“