Stórsigur hjá Róberti og félögum

Róbert Gunnarsson. mbl.is/Kristinn

Róbert Gunnarsson og samherjar hans í Gummersbach unnu stóran sigur á Balingen, 35:22, á heimavelli í þýsku 1. deildinni í handknattleik í dag. Róbert skoraði eitt mark í leiknum og var einu sinni vísað af leikvelli. Gummersbach er í sjötta sæti deildarinnar eftir þennan sigur.

Dagur Sigurðsson og lærisveinar hans í Füchse Berlin unnu kærkominn sigur á útivelli á Hannover-Burgdorf, 28:26. Rúnar Kárason skoraði ekki mark að þessu sinni fyrir Berlínarliðið. Hannes Jón Jónsson gerði eitt af mörkum Burgdorf.

Staðan í þýsku 1. deildinni í handknattleik.

Einar Ingi Hrafnsson skoraði fimm mörk fyrir Nordhorn þegar það vann Ahlener SG, 30:27, á útivelli í norðurriðli þýsku 2. deildarinnar. Einar lét mikið til sína taka í vörninni og var þrisvar sinnum vísað af leikvelli í tvær mínútur sem lauk með því að hann sá rauða spjaldið á 54. mínútu. Ólafur Bjarki Ragnarsson hefur ekki jafnað sig eftir að hafa brotið þumlaingur snemma árs. Hann lék því ekki með Ahlener SG að þessu sinni.

Nordhorn er í fjórða sæti riðilsins, sjö stigum á eftir Hamm sem trónir á toppnum. Ahlener SG er fimmta sæti.