„Vissi um öryggistaðinn hans“
Magnús Erlendsson markvörður Fram. mbl.is/Kristinn
Eftir Stefán Stefánsson, ste@mbl.is„Ég vissi hvað hann ætlaði að gera því þetta er öryggistaðurinn hans og þangað skjóta menn þegar þeir eru undir pressu en ég beið samt eftir skotinu og gaf honum hornið en lokaði því svo“ sagði Magnús Gunnar Erlendsson markvörður Fram sem varði á lokasekúndu leiksins frá Ragnari Hjaltested úr horninu og tryggði Fram 25:24 sigur á HK þegar liðin mættust í Digranesi í kvöld.
„Við höfum nú unnið þrjá síðustu leiki, reyndar alla með einu marki. Við höfum verið óheppnir í vetur með meiðsli og leikbönn en nú erum við komnir með kjarnann, sem átti að spila allann veturinn en Daníel og Guðjón hafa að vísu bæst við. Við förum nú batnandi með hverjum leik, sóknarleikurinn er að vísu ennþá dálítið ryðgaður en varnarleikurinn allur að koma. Það sem vantaði í fyrstu leikina eftir áramót, jafnan leik við Hauka og Val sem við áttum að vinna, var sjálfstraustið og það er nú að koma, við höfum nú spilað þrjá jafna leiki og unnið þá alla, sem er frábært fyrir framhaldið. Menn hafa gefið yfirlýsingu um að við ætlum ekki að falla, erum einfaldlega með alltof gott lið til þess og ætlum að sanna nú í þriðju umferð að við ættum að vera í toppbaráttunni ef þessi mannskapur hefði verið með allt mótið,“ sagði Magnús við mbl.is í kvöld.
