Valur deildarmeistari
Hrafnhildur Skúladóttir og stöllur hennar í Val eru deildarmeistarar. mbl.is/Ómar Óskarsson
Valur tryggði sér í dag deildarmeistaratitilinn í N1-deild kvenna í handknattleik þegar liðið vann stórsigur á HK, 38:19, en liðin áttust við í Digranesi.
Elín Anna Baldursdóttir skoraði 5 mörk fyrir HK en hjá Val var Hildigunnur Einarsdóttir markahæst með 9 mörk og Anna Úrsúla Guðmundsdóttir skoraði 8.
Haukar gerðu góða ferð til Akureyrar en Hafnarfjarðarliðið vann fjögurra marka sigur, 35:31. Martha Hermannsdóttir skoraði 10 mörk fyrir Akureyrarliðið en hjá Haukum var Hanna G. Stefánsdóttir að venju markahæst en hún skoraði 11 mörk.
Fylkir hafði betur gegn FH í Kaplakrika, 34:24, og náði þar með fimmta sætinu. Sunna Jónsdóttir var markahæst í liði Fylkis með 8 mörk en hjá FH var Ragnhildur Rósa Guðmundsdóttir atkvæðamest með 8 mörk en athygli vakti að hún hlaut ekki náð fyrir augum Júlíusar Jónassonar landsliðsþjálfara en Ragnhildur hefur leikið vel með FH liðinu í vetur.
Í Safamýrinni hafði Fram betur gegn Stjörnunni, 27:23. Sigurbjörg Jóhannsdóttir skoraði 8 mörk fyrir Fram og Hildur Þorgeirsdóttir 6. Hjá Stjörnunni voru þær Jóna Sigríður Halldórsdóttir og Harpa Sif Eyjólfsdóttir atkvæðamestar með 5 mörk hvor.
