Andri: Jafnvel of værukærir

Akureyringar urðu að sætta sig við tap á Seltjarnarnesi í dag. mbl.is/Steinn Vignir

„Fyrst og fremst fór hræðilegur fyrri hálfleikur með þetta hjá okkur,“ sagði Andri Snær Stefánsson sem gerði 8 mörk fyrir Akureyri í 29:26 tapi fyrir Gróttu í dag í N1-deildinni í handknattleik.

Sex af þessum mörkum komu úr vítum, þar sem Andri Snær sýndi mikið öryggi en honum var þó klaufaskapur norðanmanna hugleikinn.

„Ég veit ekki hvað veldur, við áttum frábæran leik gegn FH í síðasta leik og höfum jafnvel verið of værukærir, haldið að við þyrftum ekkert að hafa fyrir sigri en Gróttumenn mættu eins og grenjandi ljón svo við vorum heppnir að vera ekki meira undir eftir fyrri hálfleik. Við þurftum svo að hleypa leiknum aðeins upp eftir hlé til að komast inní hann og það tókst næstum en vorum bara klaufar, sjálfum okkur verstir og Grótta var miklu betra liðið í dag,“ sagði Andri Snær.