Hjalti: Dramað þjappað okkur saman

Hjalti í baráttu við Heimi Örn Árnason í dag. mbl.is/Steinn Vignir

Hjalti Þór Pálmason fór á kostum gegn Akureyri í dag þegar hann skoraði 11 mörk í 29:26 sigri Gróttu í N1-deildinni í handknattleik en var mun ánægðari með sigurinn.

„Eins og menn vita höfum við oft verið lygilega nálægt því að vinna fleiri leiki í vetur og leiðinlega oft tapað með einu marki.  Okkur hefur sjálfum fundist stígandi í liðinu en  oft fundist vanta einhvern smá neista til að gera út um leiki,“ sagði Hjalti eftir leikinn.

„Við vorum grátlega nálægt því gegn Haukum um daginn og ætli það hafi ekki verið kornið sem fyllti mælinn. Svo er dramað í kringum Halldór Ingólfsson og að Geir Sveinsson kom til að taka við en það hefur líklega bara þjappað liðinu betur saman, líklega verið sparkið sem þurftum að fá í rassinn. Geir hefur verið með okkur í viku og ekki farið útí miklar taktískar breytingar en hann er gríðarlega reyndur, menn hlusta á hann og hann hefur náð meiri yfirvegun í leik okkar. Það hefur kannski verið það sem þurfti,“ sagði Hjalti eftir leikinn.