„Kallaður til og var klár í það“

„Vandamálið snerist bara um að samningur minn við Hauka var kunngerður svo snemma, en málið er núna búið,“ sagði Halldór Ingólfsson fyrrverandi þjálfari Gróttu í N1-deild karla en hann hefur ákveðið að leika áfram með liðinu þrátt fyrir brottreksturinn á dögunum sem kom í kjölfar þess að hann samdi við Hauka um þjálfun liðsins á næstu leiktíð.

„Aðalatriðið er auðvitað að við höldum okkur uppi og Grótta þurfti allan þann stuðning sem hægt er að fá, ég var kallaður til og var alveg klár í það,“ sagði Halldór sem lagði sitt af mörkum þegar liðið vann Akureyri 29:26 á Seltjarnarnesi í gær.

„Við vitum að getan er til staðar í liðinu og það þurfti bara þennan neista sem verið hefur í liðinu. Við vorum komnir alveg upp við vegg en menn eru staðráðnir í að halda sér uppi. Þetta er það sem koma skal í síðustu fjórum leikjunum og ég hef alla tíð haft fulla trú á liðinu. Hún hverfur ekki,“ sagði Halldór.