Stórleikur Berglindar nægði ekki

Berglind Íris Hansdóttir fer vel af stað með Fredrikstad í norsku úrvalsdeildinni í handbolta. Golli / Kjartan Þorbjörnsson

Berglind Íris Hansdóttir, landsliðsmarkvörður í handknattleik, lék afar vel í sínum fyrsta leik með norska úrvalsdeildarliðinu Fredrikstad um helgina þegar keppni í norsku úrvalsdeildinni hófst. Stórleikur hennar nægði þó liðinu ekki sem tapaði 26:20, fyrir Byåsen á heimavelli.  Fredrikstad er nýliði í deildinni en Byåsen varð í öðru sæti deildarinnar á síðasta keppnistímabili.

Berglind Íris gekk til liðs við Fredrikstad í sumar eftir að hafa leikið nær allan sinn feril með Val. Hún er aðalmarkvörður liðsins og stimplaði sig svo sannarlega inn í norsku úrvalsdeildina með afar góðum leik á heimavelli. Fredrikstad var tveimur mörkum undir í hálfleik, 10:8.

Levanger, liðið sem Ágúst Jóhannsson þjálfar og Rakel Dögg Bragadóttir landsliðskona leikur með, fór ekki vel af stað í norsku úrvalsdeildinni. Það tapaði á heimavelli, 20:17, fyrir Vipers Kristiansand. Fyrrverandi markvörður Levanger, sem nú leikur með  Kristiansand reyndist fyrrverandi samherjum sínum erfiður í leiknum.

Þrátt fyrir tapið þá lék Rakel Dögg vel. Hún skoraði þrjú mörk. Ramune Pekarskyte, fyrrverandi leikmaður Hauka sem gekk til liðs við Levanger í sumar, var í strangri gæslu allan leikinn og náði sér aldrei á strik. Hún skoraði aðeins tvö mörk.