Íslendingar í sigurliðum

Arna Sif Pálsdóttir, landsliðskona í handknattleik og leikmaður Team Esbjerg. Eggert Jóhannesson

Íslensku landsliðskonurnar í handknattleik og fyrrverandi leikmenn HK, Arna Sif Pálsdóttir og Rut Jónsdóttir, voru báðar í sigurliðum þegar fyrsta umferð dönsku úrvalsdeildarinnar í handknattleik var leikin í gærkvöldi. 

Arna Sif, sem gekk til liðs við Team Esbjerg í sumar frá Horsens HK, skoraði tvö mörk og var einu sinni vísað af leikvelli í tvær mínútur þegar lið hennar vann SK Aarhus, 28:23, í Árósum.

Rut Jónsdóttir skoraði þrjú mörk þegar Team Holstebro vann stórsigur á nýliðum SönderjyskE, 30:20, á útivelli á suður Jótlandi. Rut er nú að hefja sitt þriðja keppnistímabil með Team Holstebro en hún endurnýjaði samning sinn við félagið í vor til tveggja ára.

FIF frá Friðriksbergi í nágrenni Kaupmannahafnar tapaði á heimavelli fyrir KIF Kolding, 28:19. Þorgerður Anna Atladóttir, sem gekk til liðs við FIF í sumar, var ekki á meðal markaskorara liðsins í gær.