Fram heldur áfram með kærumálið

Stjórn handknattleiksdeildar Fram kom saman í hádeginu vegna kærumálsins á hendur Valsmönnum í bikarkeppni karla. Ákveðið  var að halda áfram með málið og það fer því sína leið í dómskerfinu.

Reynir Stefánsson varaformaður handknattleiksdeildar Fram staðfesti þetta við mbl.is rétt í þessu. „Eftir að hafa rætt við okkar álitsgjafa er það samdóma álit að við séum með skothelt mál í höndunum og munum halda því áfram," sagði Reynir en vildi ekki ræða málið að öðru leyti.

Valsmenn hafa fengið frest til hádegis á morgun til að skila greinargerð í málinu.

Valur vann Fram í undanúrslitum bikarkeppninnar á sunnudaginn. Fram kærði á þeim forsendum að Markús Máni Michaelsson Maute, sem tók fram skóna og lék með Val, hefði ekki verið með gildan leikmannasamning.

Eins og fram kemur í Morgunblaðinu í dag var leikmannasamningur Markúsar sendur skrifstofu HSÍ með faxi nokkrum stundum fyrir leikinn á Hlíðarenda og þar með telja Valsmenn sig hafa verið í fullum rétti með að tefla honum fram.

• 1 blogg um fréttina

Bloggað um fréttina

• HAUKAR - Meistaraflokkur karla 2012-2013: Fram í hnotskurn!!!