Geta fengið leik við Noreg fyrir ÓL-umspil
Aron Pálmarsson sækir að vörn Norðmanna í leik þjóðanna á EM. Reuters
Íslenska landsliðinu í handknattleik karla stendur til boða að mæta norska landsliðinu í vináttulandsleik áður en það tekur þátt í umspilsleikjum fyrir Ólympíuleikana í byrjun apríl.
Einar Þorvarðarson, framkvæmdastjóri HSÍ, segir að Norðmenn séu tilbúnir að mæta íslenska landsliðinu í Laugardalshöll í vikunni fyrir páskahelgina þegar umspilsleikirnir fara fram. Að sögn Einars hefur HSÍ ekki þekkst boð Norðmanna en meiri líkur en minni eru á að því verði tekið.
Lítill tími gefst til undirbúnings fyrir ólympíuumspilið sem fram fer 6.-8. apríl. Síðar í dag kemur í ljós hvar og við hverja íslenska landsliðið leikur í umspilinu.
Unnið er að því að fá landsleik í byrjun júní áður en að leikjunum við Hollendinga kemur í undankeppni HM. Möguleiki er á að íslenska landsliðið mæti þá Dönum en HSÍ á hönk upp í bakið á danska handknattleikssambandinu.
