Getum verið mjög sáttir
Guðmundur ræðir við leikmenn sína á EM. Reuters
Guðmundur Þórður Guðmundsson, þjálfari karlalandsliðsins í handknattleik, segist vera sáttur með mótherja Íslendinga, bæði í umspili fyrir heimsmeistaramótið og í undankeppni fyrir Ólympíuleikana.
Íslendingar drógust á móti Hollendingum í umspili fyrir HM og síðan varð það ljóst eftir að Danir tryggðu sér Evrópumeistaratitilinn að Ísland leikur í riðli með Króatíu, Japan og Síle í undankeppni fyrir Ólympíuleikana og verður riðilinn spilaður í Króatíu í byrjun apríl.
„Miðað við það sem var í boði þá held ég að við getum verið sáttir við að mæta Hollendingum. Hins vegar er engin ástæða til að vanmeta þá því eins og handboltinn er orðinn í dag þá þarf að taka öll lið alvarlega alveg sama hvað þau heita. Við verðum að fara á fullum krafti í þessa leiki á móti Hollendingunum,“ sagði Guðmundur við Morgunblaðið í gærkvöld.
Sjá lengra viðtal við Guðmund í Morgunblaðinu í dag.
